ഞാന്‍

കരയുന്നില്ല

കരഞ്ഞാല്‍
പ്രളയമുണ്ടാകുമത്രെ
നെടുവീര്‍പ്പയക്കുന്നില്ല
നെടുവീര്‍പ്പ്‌
കൊടുങ്കാറ്റാകുമത്രെ
മൗനിയാകാനും വയ്യ
മൗനം
വാചാലമത്രെ
...................................................

അക്ഷരാര്‍ഥം .........

അലിഫ്‌ .
ലാം …….
മീം …….

അലിഫ്‌ .
ഒരക്ഷരമല്ല .
പ്രകാശ നിര്‍ത്ധരിയുടെ
അണയാത്ത നെയ്തിരി .

ലാം …….
ഒരക്ഷരമല്ല .
ആദര്‍ശ സാക്ഷ്യത്തിന്റെ
അടങ്ങാത്ത പടഹധ്വനി.

മീം …….
ഒരക്ഷരമല്ല .
വഴി കാട്ടിയുടെ
നാദ ബ്രഹ്മ സ്വരജതി.

...............

അറിവിന്റെ ലോകത്തെ
ആശയ കിരണങ്ങളെ
ഗര്‍ഭം ചുമന്ന അക്ഷരങ്ങള്‍ .

പദ പഥങ്ങളില്‍
ചംക്രമണം ചെയ്യുന്ന
സൌര (സാര) യൂഥങ്ങള്‍ .

ചിന്താ സരണികളിലൊതുങ്ങാത്ത
തൂലികത്തുമ്പില്‍  വഴങ്ങാത്ത
പുസ്‌തകത്താളുകളില്‍  പതിഞ്ഞു തീരാത്ത
ആശയ പ്രപന്ചം .

വായനയുടെ
ആത്മീയ വിഹായസ്സില്‍
ഉദിച്ചുയരുന്ന
നവ ജാത ഗ്രഹങ്ങളില്‍
അക്ഷരാര്‍ഥം
തിരയുന്ന
വസന്ത ലോകം .
............

തെളിനീര്‍ ധാര ….

പ്രക്ഷുബ്‌ധമായ  പാരാവാരത്തില്‍
*രുചി ഭേദങ്ങളുടെ
രണ്ട്‌ ധാരകള്‍ ..

ഒന്ന്‌
ചവര്‍പ്പുള്ളത്‌
മറ്റേത്‌
കലര്‍പ്പില്ലാത്തത്‌...

അടിയൊഴുക്കുകള്‍ക്കും
അലയടികള്‍ക്കും
കീഴടക്കാനാകാത്ത
പ്രവാഹം ..

ആഴിയുടെ ആഴങ്ങളില്‍
രൌദ്ര ഭാവങ്ങളുടെ
വേഷപ്പകര്‍ച്ചയിലും
ശാന്തസുന്ദരമായൊഴുകുന്ന
ശുദ്ധമായ
തെളിനീര്‍ ധാര…

വിചിന്തനങ്ങളുടെ
വിഹായസ്സില്‍
വിഹരിക്കുന്നവര്‍ക്ക്
അനുഭൂതിദായകം ..

വിസ്‌മയങ്ങളുടെ
ആഴക്കയത്തില്‍
മുങ്ങിത്തുടിക്കുന്നവര്‍ക്ക്‌
നിലയില്ലാ കയം ...

**********


* കലര്‍പ്പില്ലാത്ത ശുദ്ധജല പ്രവാഹത്തെക്കുറിച്ചുള്ള ഖുര്‍ആന്‍ പരാമര്‍ശം