Sunday, July 1, 2018

ചിത്ര വര്‍‌ഷങ്ങള്‍

ഹൃദയാവര്‍‌ജ്ജകമായ ഒരു കലാ വിരുന്ന്‌. അരങ്ങിലും അണിയറയിലും പ്രവര്‍‌ത്തിച്ചവര്‍ അഭിനന്ദനം അര്‍‌ഹിക്കുന്നു.മാധ്യമം ഒരുക്കിയ ചിത്ര വര്‍‌ഷങ്ങള്‍ പ്രവാസ കലാ ലോകത്തെ ഒരു അടയാളപ്പെടുത്തലായിരുന്നു..സം‌ഘാടനത്തിലും സംവിധാനത്തിലും അവതരണത്തിലും വ്യതിരിക്ത അവകാശപ്പെടാനാകുന്നതിലുപരി നല്ലൊരു ശതമാനം ഉയര്‍‌ന്ന നിലവാരമുള്ള ആസ്വാദക വൃന്ദം എന്ന പ്രത്യേകത വിശേഷാല്‍ എടുത്തുദ്ധരിക്കാതെ തരമില്ല.

വളരെ സാന്ദര്‍‌ഭികമായി ഒരു കാര്യം കൂടെ പങ്കുവെക്കട്ടെ.ചിത്രച്ചേച്ചിയുടെ അനുഭവങ്ങളുമായി ബന്ധപ്പെട്ട മറുപടിക്ക്‌ പ്രതികരണമായി അവതാരകന്‍ പറഞ്ഞു."കൃഷ്‌ണനായാലും,ബുദ്ധനായാലും,യേശുവായാലും,അല്ലാഹുവായാലും എല്ലാം ദൈവ കീര്‍‌ത്തനം...."അഥവ അല്ലാഹു എന്നാല്‍ പ്രവാചകനൊ,പരിവ്രാചകനൊ,അവതാര പുരുഷനൊ ഒക്കെയായിരിയ്‌ക്കും എന്ന ധാരണയാണ്‌ ഇവിടെ അരക്കിട്ടുറപ്പിക്കപ്പെടുന്നത്.ചുരുക്കത്തില്‍ സമൂഹത്തിലെ സിംഹ ഭാഗം വിദ്യാസമ്പന്നരുടെ പോലും ഇസ്‌ലാമിലെ ദൈവ വിശ്വാസത്തെ കുറിച്ചുള്ള സങ്കല്‍‌പം ഏറെ വിചിത്രമാണ്‌ എന്നു സാരം .ഇതു തിരുത്തപ്പെടേണ്ടതത്രെ.

ഈശ്വര്‍,ഖുദാ,ഗോഡ്‌, സുരിയാനി ഭാഷയിലെ യഹോവ എന്നിത്യാദി പ്രയോഗങ്ങളുടെ അറബി ഭാഷാന്തരം മാത്രമാണ്‌ അല്ലാഹു.അല്ലാതെ ഒരു മുസ്‌ലിം ദൈവത്തെ പ്രതിനിധാനം ചെയ്യുന്ന പദമല്ല.വേദങ്ങളുടെ ഒക്കെ അറബി ഭാഷാന്തരത്തില്‍ ഈശ്വര്‍ എന്നതിന്റെ തര്‍‌ജ്ജുമ അല്ലാഹു എന്നു കാണാവുന്നതാണ്‌.അറബി ബൈബിളിലും അങ്ങിനെ തന്നെ.

ഇസ്‌ലാം എന്ന ദര്‍‌ശനത്തെ കുറിച്ചും അതുള്‍‌കൊള്ളുന്ന മുസ്‌ലിമിനെ കുറിച്ചും പൊതു സമൂഹത്തിലുള്ള തെറ്റിദ്ധാരണകളുടെ ആഴം അളക്കാനാകുകയില്ല.ദൈവം അനുഗ്രഹിക്കുമാറാകട്ടെ.
ഒരിക്കല്‍ കൂടെ അഭിനന്ദനങ്ങളോടെ...

അസീസ്‌ മഞ്ഞിയില്‍..