തൃശൂർ ജില്ലയിലെ മുല്ലശ്ശേരി തിരുനെല്ലൂർ പൗര പ്രമുഖനായിരുന്ന രായം മരക്കാർ വീട്ടിൽ മഞ്ഞിയിൽ ബാപ്പുട്ടി സാഹിബിന്റെ മകൻ ഖാദർ മഞ്ഞിയിലാണ്‌ പിതാവ്‌. 1982 ൽ പിതാവ്‌ ഇഹലോക വാസം വെടിഞ്ഞു. പാരമ്പര്യ ഭിഷഗ്വരന്മാരിൽ പ്രസിദ്ധനായിരുന്ന തൊയക്കാവ്‌ വൈദ്യ കേസരി ഏർ‌ച്ചം വീട്ടിൽ അമ്മുണ്ണി വൈദ്യരുടെ മകൾ ഐഷയാണ്‌ മാതാവ്‌.2017 ഒക്‌ടോബർ 5 നായിരുന്നു ഉമ്മയുടെ വിയോഗം.
===========
ബാല്യവും കൗമാരവും തുടര്‍ പഠനങ്ങളും
1966 മുതൽ 69 വരെ തിരുനെല്ലൂർ എ.എം.എൽ.പി സ്‌കൂളിലായിരുന്നു പ്രൈമറി വിദ്യാഭ്യാസം.പ്രൈമറി വിദ്യാലയത്തിൽ ആദ്യാക്ഷരം പഠിപ്പിച്ച അധ്യാപിക ഏലിയ കുട്ടി ടീച്ചറും മദ്രസ്സയിലെ ആദ്യത്തെ അധ്യാപകൻ മൂക്കലെ മുഹമ്മദ് മുസ്‌ല്യാരുമായിരുന്നു.മദ്രസ്സയിൽ ചേർത്തതിന്റെ ശേഷമാണ്‌ സ്‌കൂളിൽ ചേർ‌ത്തത്.പോൾ മാഷും സരോജനി ടീച്ചറും അധ്യാപകരായിരുന്നു.
സെന്റ്‌ ആന്റണീസ്‌ പുവ്വത്തൂരിൽ അപ്പർ പ്രൈമറിയും,ഹൈസ്‌കൂൾ പഠനം 1974 - 76 കളിൽ വെന്മേനാട്‌ എം.എ.എസ്.എം കലാലയത്തിലുമാണ്‌ അഭ്യസിച്ചത്‌.
പുവ്വത്തൂർ സ്‌കൂളിലെ ഫാത്വിമ ടീച്ചർ,ദേവകി ടീച്ചർ,മാർ‌ഗരറ്റ് ടീച്ചർ,ജോസ്‌ മാഷ്‌,ജോസഫ്‌ മാഷ്‌,ജോണി മാഷ്‌ വിശിഷ്യാ പ്രധാനാധ്യാപകൻ സെബാസ്റ്റ്യൻ മാഷ്‌ തുടങ്ങിയ ആദരണീയരാവർ പ്രാർ‌ഥനാ പൂർ‌വ്വം ഓര്‍‌മിക്കപ്പെടുന്നവരാണ്‌.
വെന്മേനാട്‌ വിദ്യാലയത്തിലെ പ്രധാനധ്യാപകനായിരുന്ന അബ്‌ദുല്ല കുട്ടിമാഷ്‌, അബൂബക്കർ മാഷ്‌,മുഐമിൻ മാഷ്‌,ജോർ‌ജ്‌ മാഷ്‌,വിജയൻ മാഷ്‌,ഇട്ടൂപ്പുണ്ണി സാർ,ജമീല ടീച്ചർ,ഐഷ ടീച്ചർ,ഫാത്വിമ ടീച്ചർ,സരോജിനി ടീച്ചർ,പത്മിനി ടീച്ചർ തുടങ്ങിയ അധ്യാപക അധ്യാപികമാരും ഓര്‍‌മകളിലെ താരങ്ങൾ തന്നെ.
1973 ൽ മദ്രസാ പഠനത്തിനു വിരാമമിട്ടു.ശേഷം ജമാലുദ്ദീൻ മുസ്‌ല്യാർ, കൂറ്റനാട്‌ മുഹമ്മദ് മുസ്‌ല്യാർ എന്നിവരുടെ ദർസിൽ തിരുനെല്ലൂർ ജുമാ മസ്‌ജിദിലും തുടർ‌ന്ന്‌ ഏകദേശം ഒരു വർ‌ഷം കുടും‌ബ പേരിൽ അറിയപ്പെടുന്ന മഞ്ഞിയിൽ പള്ളിയിൽ (മസ്‌ജിദ്‌ തഖ്‌വ) പെരിഞ്ഞനം സുലൈമാൻ മുസ്‌ല്യാരുടെ കൂടെയും ദർസിൽ ചേർന്നു.ഇടക്ക്‌ വെച്ച്‌ ദർസ്‌ പഠനം നിന്നു.വീണ്ടും 76/77 കളിൽ വെന്മേനാട്‌ കുട്ടോത്ത്‌ അബൂബക്കർ മുസ്‌ല്യാരുടെ ശിക്ഷണത്തിൽ പഠിക്കാൻ ഭാഗ്യം ലഭിച്ചിരുന്നു.
ബോംബെയിലും പ്രവാസകാലത്തും ഔദ്യോഗിക അനൗദ്യോഗിക വിദ്യാഭ്യാസം തുടർ‌ന്നു പോന്നു.ഖുർ‌ആനിക വിജ്ഞാന സമ്പാദനത്തിലെ വഴികാട്ടികളിൽ ഏറെ സ്‌മരിക്കപ്പെടുന്ന ആദരണീയ വ്യക്തിത്വങ്ങളാണ്‌ കെ.അബ്‌ദുല്ല ഹസനും എം.വി മുഹമ്മദ് സലീം മൗലവിയും.
പരമ്പരാഗത പള്ളി ദര്‍‌സ് പഠനത്തിലൂടെ വേണ്ടത്ര ശ്രദ്ധിക്കാനൊ പൂര്‍‌ത്തീകരിക്കാനൊ കഴിയാതെ പോയ അറബി ഭാഷാ പരിജ്ഞാനം മദീന യൂനിവാഴ്‌സിറ്റിയുടെ വ്യ്വസ്ഥാപിതമായ ഓണ്‍‌ലൈന്‍ പഠന സം‌വിധാനങ്ങളിലൂടെ പരിപോഷിപ്പിച്ചു.
മഹാമാരിയുടെ പ്രതിസന്ധികാലത്ത്,ഓണ്‍ ലൈന്‍ പഠന സൗകര്യങ്ങള്‍ ഉപയോഗപ്പെടുത്തി വിവിധ കോഴ്‌സുകള്‍ പൂര്‍‌ത്തീകരിക്കാന്‍ ഭാഗ്യം ലഭിച്ചു.
ഡോ.സാഫിർ, ഡോ.അബ്ദുൽ വാസീഹ് എന്നിവർ അധ്യാപകരായിരുന്നു. എല്ലാ ഗുരുവര്യന്മാരെയും പ്രാർ‌ഥനാ പൂർ‌വം സ്‌മരിക്കുന്നു.
===========
ദര്‍‌സും പഠനമനങ്ങളും...
പക്വമതിയായ ഒരു ഉസ്‌താദിന്റെ സാന്നിധ്യം കൊണ്ട്‌ മഞ്ഞിയിൽ പള്ളി എപ്പോഴും ധന്യമായിരുന്നു.
പൊന്നാനിക്കാരനായ മുഹമ്മദലി മുസ്‌ലിയാരുടെ ചിത്രം ഇപ്പോഴും മനസ്സിലുണ്ട്.തുടർ‌ച്ചയായി യാത്രക്കാരനായ അദ്ദേഹത്തിന്റെ സാന്നിധ്യം ചുരുങ്ങിയ ദിവസങ്ങൾ മാത്രമായി പരിമിതപ്പെട്ടിരുന്നു.
വടക്കന്റെ കായിൽ ഹം‌സക്കയായിരുന്നു പെരിഞ്ഞനം സുലൈമാൻ മുസ്‌ല്യാരെ മഞ്ഞിയില്‍ പള്ളിയിലേക്ക് നിയോഗിച്ചത്. മുസ്‌ല്യാരുടെ വീട്ടിൽ പെരിഞ്ഞനത്ത് ദിവസങ്ങളോളം പോയി താമസിച്ചതൊക്കെ ഓർ‌മ്മയിൽ നിറഞ്ഞു നിൽ‌ക്കുന്നുണ്ട്. ഏനാമാവ്‌ കടവ് വരെ ബസ്സുണ്ടായിരുന്നുള്ളൂ.പാലം ഉണ്ടായിരുന്നില്ല.കടത്തു കടന്ന്‌ അക്കരെ പോകണം.മണലൂർ കാഞ്ഞാണി അന്തിക്കാട് വഴിയായിരുന്നു യാത്ര.
സുലൈമാൻ മുസ്‌ല്യാർ ബോം‌ബെക്ക്‌ കൂടുമാറിയപ്പോഴായിരുന്നു കുട്ടോത്തെ അബൂബക്കർ മുസ്‌ല്യാർ പള്ളിയിൽ വന്നത്.കണ്ടം പറമ്പിൽ അഹമ്മദ്‌ക്കയായിരുന്നു അദ്ദേഹത്തെ നിയമിച്ചത്.
മഞ്ഞിയിൽ പള്ളി ദർ‌സിലെ പഠിതാക്കള്‍‌ക്കിടയില്‍ ഞാന്‍ ജൂനിയറായിരുന്നു. പൊന്നേങ്കടത്തെ സുലൈമുക്കയും,പുതിയപുര ഖമറുക്കയും ആയിരുന്നു സീനിയറുകള്‍. തെക്കെയിലെ അന്തമുക്ക, ഉസ്‌താദിന്റെ വലം കയ്യും സഹായിയും ആയിരുന്നു. ഓർ‌ക്കാൻ മധുരമുള്ള നല്ലൊരു കാലം.
ഹൈസ്‌കൂൾ വിദ്യാഭ്യാസത്തിന്‌ ശേഷം ബോംബയിൽ കച്ചവടം നടത്തിയിരുന്ന പിതാവിനൊപ്പം ചേർന്നു.ബോംബയിൽ സായാഹ്ന കോളേജിൽ പഠനം തുടർ‌ന്നു.
===========
വായനാലോകം ...
കൗമാരം വിട്ടുണരുമ്പോൾ തന്നെ ഒരു പരന്ന വായനയുടെ ശീലം എന്നെ പിടികൂടിയിരുന്നു. പത്താം തരം കഴിയുന്നതിന്നു മുമ്പുതന്നെ വായനയുടെ വിശാലമായ ലോകത്തെ പ്രാപിക്കാൻ ഭാഗ്യമുണ്ടായി.എഴുപതുകളുടെ അവസാനം ഇന്നലെക്കഴിഞ്ഞതു പോലെ മനസ്സിലുണ്ട്.
പ്രദേശത്തെ ചുക്കുബസാർ,പുവ്വത്തൂർ,പാവറട്ടി,കാക്കശ്ശേരി തുടങ്ങിയ ഗ്രാമീണ വായന ശാലകളിൽ ഹൈസ്‌കൂൾ പഠന കാലത്ത് തന്നെ അം‌ഗത്വമുണ്ടായിരുന്നു..പത്താം തരം കഴിയും മുമ്പ്‌ തന്നെ പ്രസിദ്ധങ്ങളായ ഒട്ടേറെ ക്ലാസ്സിക്കുകളും - വിശുദ്ധഖുർ‌ആൻ പരിഭാഷയും വായിക്കാൻ ഭാഗ്യം ലഭിച്ചു.
ഖുർ‌‌ആൻ പരിഭാഷ വായിച്ചതിന്റെ പ്രതികരണമായിരുന്നു മാണിക്യ ചെപ്പ്‌ എന്ന കവിത.ഈ കവിതയുടെ പേരിലാണ്‌ തൊണ്ണൂറുകളില്‍ ഒരു കവിതാ സമാഹാരം പ്രസിദ്ധീകരിച്ചത്‌.
===========
കലാലോകം ...
പതിനേഴാമത്തെ വയസ്സില്‍ 1977 ൽ തിരുനെല്ലൂരിലേയും സമീപ പ്രദേശത്തേയും കലാകാരന്മാർ ഒരുക്കിയ ശാസ്‌ത്രീയ സംഗീത പ്രാധാന്യമുള്ള നാടകത്തിന്‌ ഗാനങ്ങളെഴുതാനുള്ള അവസരമാണ്‌ കലാ സാഹിത്യ രംഗത്തേയ്‌ക്കുള്ള കടന്നു വരവിന്റെ പ്രാരംഭം.രാഗം പുവ്വത്തൂരിലെ വേലായുധന്‍ വേപ്പുള്ളി ആയിരുന്നു സംഗീത സംവിധാനം നിർവഹിച്ചത്. സംഗീത സംവിധാന മേഖലയിൽ പ്രസിദ്ധനായ മോഹൻ സിത്താരയെപ്പോലെയുള്ള കലാകാരന്മരുടെ ആദ്യ കാല സംഗീതക്കളരിയായിരുന്നു ഇത്.പ്രസ്തുത കലാ സമിതിയുടെ തന്നെ വഴികാട്ടിയും ഗുരുവുമായ പ്രസിദ്ധ ഗായകൻ കെ.ജി സത്താറിന്റെ ശബ്‌ദത്തിൽ ആകശവാണിവിയിലൂടെ രചനകള്‍ പ്രക്ഷേപണം ചെയ്‌തിട്ടുണ്ട്.
മക്കത്ത് പൂത്ത പൂവിന്‍ മണമിന്നും തീര്‍‌ന്നില്ലാ ...മദീനത്ത് മാഞ്ഞ ഖമറിന്‍ പ്രഭയിന്നും മാഞ്ഞില്ലാ.. ഏറെ പ്രസിദ്ധിനേടിയ വരികളാണ്‌.
ബോംബെയിൽ നിന്നിറങ്ങിയിരുന്ന ഗൾഫ് മലയാളി മാഗസിനില്‍ നിന്നു തുടങ്ങി നിരവധി ഓൺലൈൻ പോര്‍‌ട്ടലുകളിലും ആനുകാലികങ്ങളിലും എഴുതുന്നുണ്ട്.
===========
വഴിയടയാളം...
1977 ഒരു റമദാൻ മാസം.പി.കെ റഹീം സാഹിബിന്റെ ആഥിത്യം സ്വീകരിക്കാൻ ഭാഗ്യമുണ്ടായി.തൃശൂർ അലങ്കാർ റസ്റ്റോറന്റിൽ നിന്നായിരുന്നു നോമ്പു തുറന്നത്.ഒരുമിച്ച്‌ മഗ്‌രിബ്‌ നമസ്‌കരിച്ച്‌ വളരെ കുറഞ്ഞ സമയത്തെ സം‌ഭാഷണവും ഇടപഴക്കവും മാത്രം.യാത്ര പറഞ്ഞു പോരുമ്പോൾ മേൽ വിലാസം ആവശ്യപ്പെട്ടു.അതു കൊടുത്തു.കൂട്ടത്തിൽ രണ്ട്‌ പുസ്‌തകങ്ങളും തന്നു.
ഒന്ന് വളരെ ചെറിയ ഒരു പുസ്‌തകവും മറ്റൊന്നു തെറ്റിദ്ധരിക്കപ്പെട്ട മതം എന്ന പുസ്‌തകവും ആയിരുന്നു.ചെറിയ പുസ്‌തകം ബസ്സിലിരുന്നു തന്നെ ഏകദേശം വായിച്ചു തീർ‌ത്തു.ദാഹം തീർ‌ത്തു വെള്ളം കുടിക്കും പോലെ.മറ്റൊന്നു താമസിയാതെ വായിച്ചു തുടങ്ങി.ഇതോടെ ഞാൻ അന്വേഷിച്ചു കൊണ്ടിരുന്ന വായനാ ലോകം മലർ‌ക്കെ തുറന്ന പ്രതീതി.പിന്നെ തപാലിൽ പ്രബോധനവും വരാൻ തുടങ്ങി.
===========
വിനോദവും വിജ്ഞാനവും...
1970 -1980 കളിൽ തിരുനെല്ലൂരിന്റെ വടക്കും തെക്കും ഉള്ള അയൽ ഗ്രാമങ്ങൾ വഴി രണ്ട്‌ ചെറുപ്പക്കാർ (മുഹമ്മദ് മുസ്‌ല്യാരുടെ മകൻ അബ്‌ദുറഹിമാൻ കേലാണ്ടത്ത് പാടൂർ.അബ്‌ദുറഹിമാൻ മുസ്‌ല്യാരുടെ മൂത്തമകൻ മുഹ്‌യിദ്ദീൻ നാലകത്ത്‌ പൈങ്കണ്ണിയൂർ) . തുടങ്ങി വെച്ച ധാർമ്മിക പ്രബോധന പ്രചാരണ പരിപാടികളിൽ ഭാഗഭാക്കാകാൻ സാധിച്ചിരുന്നു.
വിനോദത്തോടൊപ്പം വൈജ്ഞാനികമായ ചര്‍‌ച്ചകളുമായി മഞ്ഞിയില്‍ പള്ളിയില്‍ ഒത്തു കൂടിയിരുന്ന പ്രിയപ്പെട്ടവര്‍ ഇന്നും അക്കാലത്തെ സാഹോദര്യ സൗഹൃദങ്ങളെ ഓര്‍‌ക്കുന്നുണ്ടാകാം.ജലാലുദ്ദീന്‍ ആര്‍.വി,ജലീല്‍ വി.എസ്,ഷം‌സുദ്ദീന്‍ തറയിൽ,അബ്‌ദുസ്സലാം അബ്‌ദുല്ല,ഉമര്‍ പൊന്നേങ്കടത്ത്,അബ്‌ദുല്ലക്കുട്ടി തെക്കെയില്‍ ഒക്കെ പ്രസ്തുത കൗമാര കൂട്ടായ്‌മയിലെ അം‌ഗങ്ങളായിരുന്നു.വാരാന്ത്യത്തില്‍ പാടൂര്‍ കാരാകോസ് പള്ളിയില്‍ ഒരുമിച്ചു കൂടിയിരുന്നവരില്‍ തിരുനെല്ലൂര്‍ പടിഞ്ഞാറെ കരയിലുള്ള റഷീദ് ഖാലിദ്, ഇഖ്‌ബാല്‍ വേത്തില്‍,കണ്ടം പറമ്പില്‍ സഹോദരങ്ങളും ഉണ്ടായിരുന്നതായി ഓര്‍‌ക്കുന്നു.
സൗഹൃദ സം‌ഘത്തിലെ പലവഴി പിരിഞ്ഞു. മുഹ്‌യിദ്ദീൻ സാഹിബിന്റെ ഒറ്റപ്പെട്ട പ്രവർത്തനങ്ങൾ തിരുനെല്ലൂർ കേന്ദ്രീകരിച്ച്‌ നടന്നിരുന്നു.1982 ഒക്‌ടോബർ മാസത്തിലാണ്‌ ഇസ്‌ലാമിക പ്രസ്ഥാനത്തിന്റെ അംഗീകൃത വിദ്യാർത്ഥി വിഭാഗമായ എസ്.ഐ.ഒ രൂപം കൊണ്ടത്‌.അതേ കാലയളവിൽ തന്നെ തിരുനെല്ലൂരിലും യൂണിറ്റ്‌ രൂപീകരിച്ചിരുന്നു.
===========
യൗവ്വനം പ്രവാസം ..
1980 ഫിബ്രുവരി 15 നായിരുന്നു പ്രവാസത്തിന്റെ പ്രാരംഭം.എന്നാൽ കമ്പനി രൂപീകരണവും മറ്റും നടന്നത്‌ രണ്ട്‌ വർ‌ഷങ്ങൾ‌ക്ക് ശേഷമായിരുന്നു. അതുവരെയുള്ള കാലം ഉടമയുടെ റുവൈസിലുള്ള അതിഥി മന്ദിരത്തിൽ കഴിയാനായിരുന്നു നിയോഗം.ഖത്തറിന്റെ തലസ്ഥാന നഗരിയായ ദോഹയിൽ നിന്നും നൂറിലേറെ കിലോമീറ്റർ ദൂരത്താണ്‌ റുവൈസ് സ്ഥിതിചെയ്യുന്നത്.ഏകദേശം ബഹറൈനുമായി അഭിമുഖം നിൽ‌ക്കുന്ന പഴയ കാല ജനവാസ കേന്ദ്രങ്ങളിലൊന്നാണ്‌ റുവൈസ്.ഇവിടെ നിന്നും മൂന്നു കിലോമീറ്റർ കിഴക്കു ഭാഗത്ത് കടലോരത്താണ്‌ പ്രസ്തുത അതിഥി മന്ദിരം.
1982 മുതല്‍ 1999 വരെ പാദരക്ഷകളില്‍ കീര്‍‌ത്തികേട്ട തമീമ ട്രേഡേഴ്‌സിന്റെ ദിവാന്‍ സ്‌ടീറ്റ് ശാഖ,2000 മുതല്‍ 2005 വരെ സിറ്റി ശാഖ,2006 മുതല്‍ 2019 വരെ ഓഫീസ് അഡ്‌മിന്‍, 2020 മുതല്‍ 2025 വരെ ട്രേഡിങ് ഡിവിഷന്‍ തുടങ്ങി യഥാക്രമം തമീമയുടെ വിവിധ വകുപ്പുകളില്‍ സേവനം ചെയ്‌തു.2026 ല്‍ നാലര പതിറ്റാണ്ടിനു ശേഷം പുതിയ ചില തീരുമാനങ്ങളിലെത്തി.
തൊണ്ണൂറുകളിൽ ദോഹയിലെ ഫാമിലി കമ്പ്യൂട്ടർ എന്ന സാങ്കേതിക വിജ്ഞാന ശാഖയിൽ നിന്നും കമ്പ്യൂട്ടർ പരിജ്ഞാനം നേടുകയും വെബ്‌ ഡവലപ്‌മന്റ്‌ കോഴ്സ് പൂർ‌ത്തിയാക്കുകയും ചെയ്‌തു.1999 അവസാനത്തിൽ മധ്യേഷ്യയിൽ നിന്നുള്ള ആദ്യത്തെ ദ്വിഭാഷ വെബ്‌സൈറ്റ് (മലയാളം ഇംഗ്‌ളീഷ്‌)ലോഞ്ച് ചെയ്‌തുകൊണ്ടായിരുന്നു ഇന്റർനെറ്റ്‌ ലോകത്തേക്കുള്ള പടികയറ്റം.സജീവ ബ്ളോഗ് എഴുത്തിനോടൊപ്പം സോഷ്യൽ മീഡിയകളിലെ സർ‌ഗാത്മക സാന്നിധ്യവുമാണ്‌.പ്രാദേശിക സാമൂഹിക സാംസ്കാരിക രാഷ്‌ട്രീയ രംഗങ്ങളിൽ വിശിഷ്യാ ഓൺലൈൻ രംഗത്തെ സംഭാവനകൾ നിരവധിയത്രെ.
തൂലിക,കവിത,രചന,സാമൂഹികം എന്നീ തലക്കെട്ടുകളിൽ മഞ്ഞിയിൽ എന്ന ബ്ളോഗ് ഓൺലൈൻ ലോകത്ത്‌ പ്രസിദ്ധമാണ്‌.സജീവ ബ്ളോഗ് എഴുത്തിനോടൊപ്പം സോഷ്യൽ മീഡിയകളിലെ സർ‌ഗാത്മക സാന്നിധ്യവുമാണ്‌.
2003 ൽ കാലിക്കറ്റ്‌ സർവകലാശാലയുടെ വിദൂരവിദ്യാഭ്യാസ പദ്ധതിവഴി ഉപരി പഠനം പൂർത്തീകരിച്ചു വരുമ്പോഴായിരുന്നു ദീർഘകാല അവധിയിൽ നാട്ടിൽ കഴിയേണ്ട സാഹചര്യം ഉണ്ടായത്. തന്റെ കഴിവുകൾ കൊണ്ട്‌ സഹൃദയരെ അത്ഭുതപ്പെടുത്തിയ മൂത്ത പുത്രൻ അബ്‌സ്വാർ എന്ന പ്രതിഭയുടെ ആകസ്‌മിക വിയോഗം.
പ്രസംഗം എഴുത്ത് എന്നീ രംഗങ്ങളിൽ അബ്‌സ്വാർ നടത്തിയ മികവ്` സമാനതകളില്ലാത്തവയായിരുന്നു. മഞ്ഞിയിൽ കുടുംബത്തിനപ്പുറം സമൂഹത്തിനൊന്നടങ്കം ഇന്നും വേദനയൂറുന്ന ഓര്‍‌മയാണ്‌ അബ്‌സാർ.ഈ ബാലപ്രതിഭയുടെ ഓർമകൾ രചനകൾ എന്നിവ പകർത്തിയ ബ്ളോഗ് ഏറെ വായനക്കാരുള്ള ഒന്നാണ്‌.
അബ്‌സ്വാറിന്റെ രചനകൾ മണിദീപം എന്ന സമാഹാരം ഐ.പി.എച് പ്രസിദ്ധീകരിച്ചിട്ടുണ്ട്‌.2003ൽ കേരളപ്പിറവി ദിവസം ശൈഖ്‌ മുഹമ്മദ് കാരക്കുന്നും ബാലചന്ദ്രൻ ചുള്ളിക്കാടും ചേർ‌ന്നായിരുന്നു പുസ്‌തകത്തിന്റെ പ്രകാശന കർ‌മ്മം നിർവഹിച്ചത്.
===========
അന്വേഷണങ്ങളും അം‌ഗീകാരങ്ങളും...
2009 ല്‍ എഫ്‌.സി.സി യും ഖത്തര്‍ ഇന്ത്യന്‍ മീഡിയ ഫോറവും സം‌യുക്തമായി ഒരുക്കിയ ജേര്ണലിസം വര്ക്ക് ഷോപ്പില്‍ പങ്കെടുത്തു.പ്രതീപ്‌ മേനോന്‍ (അമൃത) യായിരുന്നു നേതൃത്വം നല്‍‌കിയത്. ജേര്ണലിസം വര്ക്ക് ഷോപ്പ്‌ സമാപന ദിവസം കമലാ സുരയ്യയുടെ മൂത്ത മകന്‍ എം.ഡി.നാലപ്പാട്‌ സംബന്ധിച്ചിരുന്നു. ജേര്ണലിസം വര്ക്ക് ഷോപ്പില്‍ പങ്കെടുത്തവര്‍‌ക്കുള്ള അം‌ഗീകാരങ്ങള്‍ സമ്മാനിച്ചതും എം.ഡി നാലപ്പാടായിരുന്നു. കൂടാതെഎന്‍.പി ഹാഫിസ് മുഹമ്മദിന്റെ നേതൃത്വത്തില്‍ ഒരുക്കിയ പ്രത്യേക കൗണ്‍‌സിലിങ് കോഴ്സ് പൂര്‍‌ത്തിയാക്കാനും സാധിച്ചിരുന്നു.
വിവിധ തലത്തില്‍ നിന്നുള്ള അം‌ഗീകാരങ്ങള്‍ 1980 കളിലും തൊണ്ണൂറുകളിലും ലഭിച്ചിട്ടുണ്ട്‌.2017 ല്‍ തിരുനെല്ലുർ കൂട്ടായ്മയുടെ പ്രത്യേക പുരസ്‌കാരത്തിനും 2018 ല്‍ കലാകായിക സാംസ്കാരിക വേദിയായ മുഹമ്മദന്‍‌സ്‌ ഖത്തറിന്റെ സമഗ്ര സം‌ഭാവനക്കുള്ള എക്‌സലന്‍സി അവാര്‍‌ഡിനും 2019 ല്‍ നന്മ തിരുനെല്ലുരിന്റെ ഗ്രാമീണ്‍ മീഡിയ അവാര്‍‌ഡിനും കൂടതെ തനിമ ഖത്തര്‍ ,പ്രവാസി വെൽഫെയർ & കൾച്ചറൽ ഫോറം തുടങ്ങിയ വിവിധ സാമൂഹ്യ രാഷ്‌ട്രീയ സാം‌സ്‌ക്കാരിക തലങ്ങളില്‍ നിന്നുമുള്ള ആദരവിനും അംഗീകാരത്തിനും അര്‍‌ഹനായി.
2023 ല്‍ മലയാളി ഗൾഫ് സാം‌സ്‌ക്കാരിക അടയാളങ്ങള്‍ എന്ന ബ്രഹൃദ് സമാഹാരത്തില്‍ ഒരു അധ്യായം ചേര്‍‌ക്കാന്‍ അവസരം ലഭിച്ചു. തൊണ്ണൂറുകളിലും 2024 ലും എന്റെ മാണിക്യച്ചെപ്പ്, മഞ്ഞുതുള്ളികള്‍ തുടങ്ങിയ കവിതാസമാഹാരങ്ങള്‍ യഥാക്രമം പ്രിയപ്പെട്ട കവികൾ കുഞ്ഞുണ്ണി മാഷും, പ്രെഫ. സച്ചിദാനന്ദന്‍ സാറും പ്രകാശനം ചെയ്‌തു.
കേരളത്തിലെ പ്രസിദ്ധമായ ഡി 4 മീഡിയയുടെ ഇന്റർനെറ്റ്‌ പോർട്ടലിൽ ദീര്‍‌ഘകാലം നെറ്റുലകം പക്തി കൈകാര്യം ചെയ്‌തിട്ടുണ്ട്.മത സാമൂഹ്യ സാം‌സ്‌ക്കാരിക രാഷ്‌ട്രീയ സമകാലിക വിഷയങ്ങളില്‍ നൂറുകണക്കിന്‌ ലേഖനങ്ങള്‍ എഴുതി.പ്രവാസ ലോകത്തെ മലയാളം റേഡിയോകളില്‍ വിശേഷകാല പരിപാടികളിലെ ശബ്‌ദ സാന്നിധ്യമാണ്‌.
ഖത്തറിന്റെ സാമൂഹ്യ രാഷ്‌ട്രീയ സാം‌സ്‌ക്കാരിക തലങ്ങളിലെ വളര്‍‌ച്ചയും ഉയര്‍‌ച്ചയും എന്നതിലുപരി അതിനൂതനമായ പരിഷ്‌കരണ ഭൂമികയിലേക്ക് ഒരു രാജ്യം പടിപടിയായി ഉയര്‍‌ന്നുവന്നതിന്ന്‌ സാക്ഷിയാകാന്‍ ഭാഗ്യമുണ്ടായി.തെളിച്ചു പറഞ്ഞാല്‍ ഗ്രാമീണതയുടെ നിഷ്‌കളങ്ക നിശബ്‌ദതയില്‍ നിന്നും അത്യാധുനികതയുടെ നിറം പകര്‍‌ന്ന പളപളപ്പിലേക്കും ബഹളങ്ങളിലേക്കും ഒരു നാഗരികത വളര്‍‌ന്നു വികസിച്ചതിന്റെ വിവിധ ഘട്ടങ്ങള്‍ ഗൃഹതുരതയോടെ മനസ്സില്‍ പതിഞ്ഞു കിടപ്പുണ്ട്.പ്രകാശനം ചെയ്യാനിരിക്കുന്ന പ്രവാസവുമായി ബന്ധപ്പെട്ട കൃതികളില്‍ അതെല്ലാം അവസരോചിതം രേഖപ്പെടുത്തപ്പെട്ടിട്ടുണ്ട്.
പ്രധാനപ്പെട്ട ചില രചനകള്‍ അണിയറയില്‍ പുരോഗമിക്കുന്നു.നാട്ടു ചരിത്രവും മറ്റു ലേഖന സമാഹാരങ്ങളും താമസിയാതെ മഷിപുരളും.
===========
സര്‍ഗ്ഗാത്മക സൗഹൃദം...
തൊണ്ണൂറുകളിൽ അസോസിയേഷൻ സം‌ഘടിപ്പിച്ചിരുന്ന കലാ പരിപാടികളുമായി ബന്ധപ്പെട്ട്‌ സഹകരിച്ചിരുന്നു. അക്കാലത്ത് അരങ്ങേറിയിരുന്ന നാടകങ്ങളിൽ ഗാനങ്ങൾ,മറ്റ്‌ നാടൻ മപ്പിളാ കലാരൂപങ്ങൾ തുടങ്ങിയവയുടെ രചനകളിലും സജീവമായിരുന്നു.ഖത്തറിൽ ആദ്യമായി വില്ല്‌ പാട്ട്‌, ഉടുക്ക്‌ പാട്ട്‌,വഞ്ചിപ്പാട്ട്,ഓട്ടം തുള്ളൽ തുടങ്ങിയ കേരളീയ കലാ രൂപങ്ങൾ ഒരുക്കുന്നതിലും അവതരിപ്പിക്കുന്നലും സജീവ പങ്കാളിയായിരുന്നു.
അഡ്വ.ഖാലിദ് അറക്കല്‍ എ.വി.എം ഉണ്ണി കൂട്ടു കെട്ടില്‍ ഒട്ടനവധി നാടകങ്ങള്‍ അരങ്ങ് തകര്‍‌ത്ത കലാകാലം.ദോഹയില്‍ അരങ്ങേറിയ ഒട്ടേറെ നാടകങ്ങളിലെ ഗാന രചന മഞ്ഞിയില്‍ തൂലികയില്‍ നിന്നായിരുന്നു.
ആഴിക്കടിയിലെ ചിപ്പിയാണ്‌ ഞാന്‍...
കയ്യിലെരിയുന്നുണ്ട്‌ കൈതിരി
തുടങ്ങിയ നാടക ഗാനങ്ങള്‍ ജനപ്രിയങ്ങളായി ഗണിക്കപ്പെടുന്നു.
പ്രവാസികളുടെ കഥപറയുന്ന നാടകങ്ങള്‍‌ക്ക് വേണ്ടി രചിച്ച രചനകള്‍ക്ക്‌,ഖാലിദ് വടകരയുടെ ഭാവാത്മകമായ സം‌ഗീതവും പ്രമോദ് ഐ.സി.ആര്‍.സിയുടെ ഹൃദ്യമായ പശ്ചാത്തല സം‌ഗീതവും ചേര്‍‌ന്നപ്പോള്‍ ആസ്വാദകലോകം ഹൃദയപൂര്‍‌വ്വം സ്വീകരിച്ചു..
തൊണ്ണൂറുകളുടെ അവസാനം മുതലാണ്‌ മീഡിയകളുടെ വളര്‍‌ച്ചക്ക് അതിശീഘ്രം തിരികൊളുത്തപ്പെട്ടത്. പൊതുവേദികളും ഒത്തു ചേരലുകളും ഒരു ഉത്സവ പ്രതീതിയോടെയായിരുന്നു പ്രവാസികള്‍ ആഘോഷിച്ചിരുന്നത്. വര്‍‌ത്തമാനകാലത്തിരുന്ന് തിരിഞ്ഞു നോക്കുമ്പോള്‍,പരസ്‌പര സ്നേഹ സൗഹാര്‍‌ദ്ദ ബന്ധങ്ങളുടെ തെളിമയും തനിമയും നിറഞ്ഞ സമ്പന്നമായ കാലം ഒരു പഴങ്കഥയായി മാറിയിരിക്കുന്നു.
എമ്പതുകളിലും തൊണ്ണൂറുകളിലും സി.ഐ.സിയുടെ കലാസാഹിത്യ സര്‍‌ഗാത്മകതയുടെ മുഖം എല്ലാ അര്‍‌ഥത്തിലും നിറഞ്ഞു നിന്ന നാളുകളായിരുന്നു.
എ.വി.എം ഉണ്ണിയുടെ ഉമറുബ്‌നു അബ്‌ദിൽ അസീസ് എന്ന ചരിത്രാഖ്യായികയ്ക്ക് വേണ്ടി ഗാനങ്ങൾ എഴുതാനുള്ള ഭാഗ്യവും ലഭിച്ചിരുന്നു.
എസ്.എ.എം ബഷീറിന്റെ നേതൃത്വത്തില്‍ സഹൃദയരായ കലാകാരന്മാരുടെ സംഗമ വേദിയായി ഐ.സി.ആര്‍.സി പൂത്തുലഞ്ഞ് നിന്ന അവിസ്‌മരണീയ കാലം ഗൃഹാതുരതയോടെ ഇപ്പോഴും മനസ്സില്‍ സൂക്ഷിക്കുന്നുണ്ട്.
നാടക ഗാനങ്ങള്‍ ചിട്ടപ്പെടുത്തുന്നതില്‍ ഐ.സി.ആര്‍.സി കലാകാരന്മാരില്‍ എടുത്ത് പറയാവുന്ന പ്രതിഭകളില്‍ ഒരാളായിരുന്നു വിനയാന്വിതനായ ഖാലിദ് വടകര.ഭൂമി അറിയാതെ നടന്നു പോകുന്ന നിഷ്‌കളങ്കനായ കലാകാരന്‍.സൗമ്യനായ ഖാലിദ് വിടപറഞ്ഞ വാര്‍‌ത്ത ഏറെ വേദനയോടെയായിരുന്നു വായിച്ചത്.
ഖാലിദ് വടകരയുടെ സ്‌മരണാര്‍‌ഥം ഇശല്‍‌മാല ഖത്തര്‍ ഒരു സംഗീത മെഹ്‌ഫില്‍ സം‌ഘടിപ്പിച്ചിരുന്നു.പ്രസ്തുത വേദിയില്‍ നിറഞ്ഞ് നിന്ന താരമായിരുന്നു സ്‌നേഹസമ്പന്നനായ ഗായകന്‍ മശ്‌ഹൂദ് തങ്ങള്‍.
തൊണ്ണൂറുകളില്‍ അരങ്ങിലെത്തിയ ഇടത്താവളം എന്ന നാടകത്തിലെ ആഴിക്കടിയിലെ ചിപ്പിയാണ്‌ ഞാന്‍ എന്ന ഗാനം ചിട്ടപ്പെടുത്തിയത് ഖാലിദ് വടകരയായിരുന്നു. ഈ ഗാനത്തിന്റെ ആദ്യഭാഗം അനുസ്‌മരണ വേദിയില്‍ പ്രിയപ്പെട്ട തങ്ങളുടെ ശബ്‌ദത്തില്‍ പുനര്‍‌ജനിച്ചപ്പോള്‍ മനസ്സിലൂടെ മിന്നിമറഞ്ഞ വികാരവായ്‌പുകള്‍ പകര്‍‌ത്താന്‍ സാധിക്കുകയില്ല.
===========
റുമേല ഓര്‍‌മകളിലെ വസന്തകാലം...
തൊണ്ണൂറുകളില്‍ കുടും‌ബത്തോടൊപ്പം താമസിച്ചിരുന്നത് പഴയ റുമേലയിലായിരുന്നു.പ്രസ്തുത ഭാഗങ്ങള്‍ എല്ലാം വിശാലമായ ബിദ പാര്‍‌ക്കിന്റെ ഭാഗമായി കഴിഞ്ഞിരിക്കുന്നു.ഖത്തര്‍ ഗസ്റ്റ് ഹൗസിൽ നിന്നും അധികമൊന്നും ദൂരത്തിലല്ലാതെ ഒരു ഭാഗത്ത് ഇതര മതവിഭാഗങ്ങള്‍‌ക്കുള്ള ശ്‌മശാനഭൂമിയും ചെറിയ ദേവാലയവും ഉണ്ടായിരുന്നു. കോര്‍‌ണിഷിനോട് അഭിമുഖമായി ഒരു ഭാഗത്ത് ചിരപുരാതനമായൊരു പള്ളിയുണ്ട്.ഒരു കാലത്ത് മൃതശരീരങ്ങള്‍ സം‌സ്‌കരിച്ചിരുന്നത് ഈ പള്ളിയുടെ ഓരത്ത് പ്രത്യേകം സജ്ജമാക്കിയ ഇടത്തിലായിരുന്നു.ഈ പള്ളിയില്‍ വെള്ളിയാഴ‌ചകളില്‍ ജുമുഅ‌ക്ക് ശേഷം ഒരു ഖുര്‍‌ആന്‍ പഠന പരമ്പരക്ക് നേതൃത്വം നല്‍‌കിയിരുന്നു.
കേരളത്തില്‍ നിന്നും കൊണ്ടുവന്ന പ്രത്യേക ഇനം മരങ്ങള്‍ കൊണ്ടുള്ള ഈ പൗരാണിക പള്ളി ഇന്നും പഴയ പ്രൗഡി നഷ്‌ടപ്പെടാത്ത വിധം പുനര്‍‌നിര്‍‌മിച്ചിട്ടുണ്ട്.
===========
സാമൂഹ്യ രം‌ഗം...
1992ൽ മുല്ലശ്ശേരി മേഖലയിലെ മഹല്ലുകൾ കേന്ദ്രീകരിച്ച്‌ പാവറട്ടി ആസ്ഥാനമാക്കി ഉദയം പഠനവേദിയ്‌ക്ക്‌ രൂപം കൊടുക്കുന്നതിൽ പ്രദേശത്തെ സഹൃദയരോടൊപ്പം സഹകരിച്ചു.നന്മയുടെ പ്രബോധകരിൽ നിന്നും പ്രസാരകരിൽ നിന്നും ഊർജവും ആർജവവും നേടിയെടുത്ത ഒരു കൊച്ചു സംഘമാണ് ഇതിന്റെ ബീജാവാപം നടത്തിയത്.
പ്രവർ‌ത്തന നൈരന്തര്യമില്ലാതെ ദീർ‌ഘ കാലം നിശ്ചലമായിരുന്ന ഖത്തറിലെ തിരുനെല്ലൂർ പ്രവാസി കൂട്ടായ്‌മയെ പ്രവർ‌ത്തന സജ്ജമാക്കുന്നതിൽ നിർ‌ണ്ണായക പങ്കു വഹിച്ചു.
2006 ൽ അബു കാട്ടിലിന്റെ നേതൃത്വത്തിൽ രൂപീകരിക്കപ്പെട്ട പ്രഥമ അസോസിയേഷൻ പ്രവർ‌ത്തക സമിതിയിൽ ജനറൽ സെക്രട്ടറി പദവും പിന്നീടുള്ള കാലയളവുകളിൽ വിവിധ നേതൃ പദവികളും അലങ്കരിച്ചു.
സ്വന്തം ഗ്രാമമായ തിരുനെല്ലൂരിനെ അടുത്തറിയാനുതകുന്ന സൈറ്റും പ്രാദേശിക കൂട്ടായ്‌മയായ ഉദയം പഠനവേദിയുടെ പേജും ഏറെ പ്രശംസ പിടിച്ചു പറ്റിയ ഓൺലൈൻ പ്രവർത്തനങ്ങളാണ്‌.പ്രാദേശിക സാമൂഹിക സാംസ്കാരിക രാഷ്‌ട്രീയ രംഗങ്ങളിൽ വിശിഷ്യാ ഓൺലൈൻ രംഗത്തെ സംഭാവനകൾ നിരവധിയത്രെ.
വിവിധ ഘട്ടങ്ങളിൽ പ്രാദേശിക കൂട്ടായ്‌മകളുടെയും മഹല്ല്‌ പ്രവാസി സം‌ഘടനകളുടെയും പ്രവർ‌ത്തക സമിതികളിൽ അംഗമായിരുന്നു.
2013 ൽ ഹാജി കെ.പി അഹമ്മദ്‌ സാഹിബിന്റെ നേതൃത്വത്തിലുള്ള തിരുനെല്ലൂർ മഹല്ല്‌ പ്രവർ‌ത്തക സമിതിയിലേയ്‌ക്ക്‌ തെരഞ്ഞെടുക്കപ്പെട്ടു. തിരുനെല്ലൂർ മഹല്ല്‌ വൈസ്‌ പ്രസിഡന്റ്‌ പദവിയും അലങ്കരിച്ചിട്ടുണ്ട്‌.
അസോസിയേഷൻ (സി.ഐ.സി) പ്രാഥമിക അം‌ഗത്വം ലഭിച്ചത് എമ്പതുകളിലായിരുന്നു. സലീം മൗലവി കുഞ്ഞലവി സാഹിബ്‌ തുടങ്ങിയവർ അന്നത്തെ ഹൽ‌ഖയിൽ ഉണ്ടായിരുന്നു.
അസോസിയേഷന്‍ പ്രാഥമികാം‌ഗത്വം 1989 ലും 1991 ൽ പ്രവര്‍‌ത്തകനുമായി. 2020 ലാണ്‌ പ്രസ്ഥാന ക്രമപ്രരകാരം ജമാ‌അത്ത് അം‌ഗത്വത്തിന്‌ അര്‍‌ഹനായത്.
===========
വിവാഹം ..
1985 ഏപ്രിൽ ഒന്നിനായിരുന്നു വിവാഹം.1990 ജനുവരി 5 നായിരുന്നു ആദ്യത്തെ കൺ‌മണി അബ്‌സ്വാറിന്റെ ജനനം.പതിമൂന്നാമത്തെ വയസ്സിൽ അല്ലാഹുവിലേയ്‌ക്ക്‌ യാത്രയായി.ഐ.പി എച് പ്രസിദ്ധീകരിച്ച മണിദീപം അബ്‌സ്വാറിന്റെ കവിതാ സമാഹാരമാണ്‌.
ഐക്കപ്പറമ്പില്‍ സുബൈറയാണ് നല്ല പാതി. അബ്‌സ്വാര്‍ (മണിദീപം), അന്‍സാര്‍, ഹിബ, ഹമദ്,അമീന എന്നിവരാണ് മക്കള്‍. മരുമക്കള്‍:- ഷമീര്‍ മന്‍‌സൂര്‍ നമ്പൂരിമഠം, ഇര്‍‌ഫാന ഇസ്‌ഹാഖ് കല്ലയില്‍.ഹിബ ഷിബിലി ബുഖാറയില്‍. പേരമക്കള്‍:മുഹമ്മദ് ഫലഖ്, മുഹമ്മദ് ഫായിഖ്.അസ്‌മ നൂർ.
===========
